Koreana utas sa 2 holdaper sa coffee shop

PATAY noon din ang isang Koreana makaraang barilin ng isa sa dalawang holdaper sa loob ng isang coffee shop sa Brgy. Holy Spirit, Quezon City kahapon.

Sa inisyal na ulat ng Quezon City Police District-Criminal Investigation and Detection Unit (QCPD-CIDU), kinilala ang biktimang si Mi Kyung Park, 40, residente ng Eastwood Regrant Tower, Brgy. Bagumbayan ng lungsod.

Sa imbestigasyon, dakong 1:30 p.m. nang maganap ang insidente sa Bean Leaf Coffee shop sa Holy Spirit Drive, Brgy. Holy Spirit.

Nauna rito, pumasok ang biktima sa coffee shop ngunit lingid sa kanyang kaalaman ay kasalukuyang hinoholdap ang nasabing establisimento.

Umorder ang biktima sa counter at nang makita na hinoholdap ang coffee shop ay nagtangkang lumabas ngunit pinigilan ng mga holdaper.

Ngunit nagpumilit sa paglabas ang Koreana na naging dahilan upang barilin siya ng isa sa mga suspek.

Pagkaraan ay tumakas ang mga suspek na naglakad lamang palayo.

Almar Danguilan