Magtiyuhing cock breeder utas sa kostumer

KAPWA binawian ng buhay ang magtiyuhin na nag-aalaga ng sasabunging manok makaraan pagbabarilin ng dalawang lalaking nagpanggap na kostumer sa Brgy. Silangan, Sta. Maria, Bulacan kamakalawa. 

Kinilala ang mga biktimang sina Salvador Endaya, 64, at Roberto Fombuena, 50, kapwa residente ng Brgy. FVR, Norzagaray, sa naturang lalawigan.

Ayon sa ulat ng pulisya, magkasama ang magtiyuhin sa kinalalagyan ng inaalagaan nilang mga manok nang dumating ang mga suspek na nagpanggap na bibili ng sasabungin.

Ngunit makalipas ang ilang oras ay pinagbabaril sila ng mga suspek at pagkaraan ay mabilis na tumakas,

Kasalukuyan nang tinutugis ng mga awtoridad ang mga suspek na hindi binanggit ang pangalan upang hindi maunsiyami ang operasyon.

Micka Bautista