Dalagita ginahasa ng pinsan sa fishpond

LA UNION – Isinugod sa ospital ang isang 16-anyos dalagita makaraan gahasain ng kanyang pinsan sa bayan ng Bauang, La Union, sa mismong araw ng Pasko.

Ayon sa mga kamag-anak ng biktima, nakipag-inoman at nakipaglaro ang dalagita ng tagu-taguan sa kanyang mga pinsan makaraan ang Simbang Gabi at Noche Buena.

Pagkatapos nito, kumuha ang biktima ng kumot sa loob ng bahay upang ibigay sa kanyang pinsan at suspek na si Jerick Baladong, 19-anyos.

Ngunit bigla na lamang hinila ng suspek ang biktima at dinala sa fishpond kung saan ginawa ang kahalayan.

Ayon sa mga pinsan ng biktima, nakita nila ang paghila ng suspek sa dalagita ngunit hindi nila sinundan.

Dakong 1 a.m. nang matagpuan ang biktima sa ilalim ng punong-kahoy na wala nang pang-ibabang saplot.

Natagpuan din sa tabi niya ang underwear at shorts ng nabanggit na suspek.

Agad inaresto at ikinulong ng mga awtoridad si Baladong makaraan magsumbong ang dalagita na ngayon ay patuloy na isinasailalim sa pagsusuri.