HATAW! D'yaryo ng Bayan hatawtabloid.com
MAKARAAN magbirong nalulunod, natuluyan ang isang 17-anyos estudyante habang naliligo sa Manila Bay kasama ang 12 kabataan kahapon ng umaga sa Maynila.
Patay na bago idating sa Ospital ng Maynila (OSMA) ang biktimang si Marvin Cuaresma, 17, ng 1421 P. Guevarra St., Sta. Cruz, Maynila.
Sa imbestigasyon ni SPO2 Jonathan Bautista, ng Manila Police District-Homicide Section (MPD-HS), dakong 7:30 a.m., nang mangyari ang insidente sa tabi ng Manila Ocean Park.
Pahayag ng apat sa kasama ng biktima, nagkayayaan sila magpunta at maligo sa Manila Bay bandang 3:00 a.m.
Sa simula, ilang beses sumigaw ang biktima na siya ay nalulunod, nang sagipin ng mga kasama ay inamin na nagbibiro lamang siya.
Ilang minuto ang nakalipas, muling sumigaw ang biktima ng saklolo pero hindi pinansin ng mga kasama sa pag-aakalang nagbibiro pa rin, hanggang tuluyang lamunin ng dagat.
Isang diver na kinilalang si William dela Cruz, ang nilapitan para humingi tulong ng mga kaibigang sina Jerico del Rosario, Jun Adrian Ortiz at Russel Talavares, ang sumisid sa dagat kaya naiahon ang katawan mula sa ilalim. (LEONARD BASILIO)
