Biyenang lalaki todas sa hampas ng manugang

VIGAN CITY – Basag ang ulo at mukha ng isang lalaki nang hampasin ng airgun ng kanyang manugang sa Narvacan, Ilocos Sur kamakalawa.

Kinilala ang biktimang namatay na si Cesar Cambe, 47, magsasaka, habang ang suspek na kanyang manugang ay si Marvin Pascua, 28, tubong Santol, La Union, kapwa nakatira sa Brgy. Lungog sa nasabing bayan.

Batay sa imbestigasyon ng PNP Narvacan, magkasama ang magbiyenan na dumalo sa isang birthday party sa kanilang lugar ngunit nagtalo sila kaya umuwi ang biktima.

Makaraan ang isang oras, lumabas si Cambe sa kanilang bahay at nakasalubong ang manugang na nagresulta sa muli nilang pagtatalo.

Sa kalagitnaan ng pagtatalo, pinaghahampas ng manugang ang ulo at mukha ng kanyang biyenan sa pamamagitan ng isang airgun na ikinamatay ng biktima.

Nakapiit na sa Narvacan Municipal Jail ang suspek.

(BETH JULIAN)