Expanded truck ban sa Parañaque sisimulan na

IPATUTUPAD ni Parañaque City Mayor Edwin Olivarez ang expanded truck ban sa Lunes, Agosto 25, upang maibsan ang traffic congestion sa major roads habang inihahanda ang pagsasara sa Sucat Interchange na inaasahang magiging sanhi nang mas matinding pagbagal ng mga sasakyan sa lungsod.

Ayon kay Olivarez, sumang-ayon ang mga miyembro ng trucker’s association makaraan ang konsultasyon sa kanilang hanay sa isinagawang pagpupulong upang himayin ang isyu ng expanded truck ban bago ang implementasyon.

“We recognize the important role of truckers in our local economy because there are so many logistics and transport companies operating in Parañaque as a result of our proximity to the Ninoy Aquino International Airport. That is why we are implementing a selective truck ban to lessen the impact on our businessmen,” pahayag ni Olivarez.

Sinabi ng alkalde, ang lungsod ay may existing truck ban sa inaprobahang ordinansa, ilang taon na ang nakararaan, at ngayon lamang ito ipatutupad sa secondary roads.

Tiniyak ni Olivarez, ipatutupad ang truck ban sa Lunes sa pangunahing mga lansangan katulad ng Dr. A. Santos Avenue (Sucat Road), East and West Service Roads sa South Luzon Expressway, Ninoy Aquino Avenue, Airport Road, at Quirino Avenue.

(MANNY ALCALA)