HATAW! D'yaryo ng Bayan hatawtabloid.com
LEGAZPI CITY – Posibleng maganap ang “power blast” sa Mayon Volcano bunsod ng umusbong na lava dome sa bunganga ng bulkan.
Sinisikap ng Philippine Institute of Volcanology and Seismology (Phivolcs) na makunan ng larawan ang nasabing kumakapal na lava dome.
Ito’y para madetermina kung patuloy ito sa paglaki at kung nagkakaroon nang pagbabago sa posisyon sa ibabaw.
Ayon kay Phivolcs Bicol Region Chief Ed Laguerta, kapag kumapal pa ang lava dome at matakpan nito ang mismong crater, maaapektuhan nito ang degassing sa loob, kaya malaki ang posibilidad na pagsabog nito.
Aniya, ang ganitong mga sitwasyon sa bulkan ay nangyari na noong taon 2000 na sinundan nang malakas na pagsabog kasama ang towering at cauliflower-like dark ash columns hanggang 10 kilometro sa himpapawid.
Aniya, “power blast” ang mangyayari sakaling tuluyang mabarahan nang lava dome sa crater ng bulkan ang magma gases na pilit na kumakawala mula sa loob.
TAAL VOLCANO BINABANTAYAN DIN
BINABANTAYAN din ng Philippine Institute of Volcanology and Seismology (Phivolcs) ang Taal Volcano sa Batangas makaraan makapagtala ng anim na paggalaw ng bulkan sa loob lamang ng 24 oras.
Sa inilabas na bulletin ng Phivolcs, walang napipintong pagsabog ang bulkan Taal at nananatiling nasa alert level 1 ito.
Patuloy pa rin ang babala ng Phivolcs sa mga residente roon na huwag munang lumapit sa lugar dahil baka biglang magkaroon ng pagsabog at maglabas ng toxic gases na delikado sa kanilang kalusugan.
