HATAW! D'yaryo ng Bayan hatawtabloid.com
PATAY ang dalawang holdaper makaraan makipagbarilan sa isang pulis-Caloocan nang holdapin ang isang gasolinahan sa Brgy. Baesa, Quezon City kamakalawa ng gabi.
Hindi pa nakikilala ang napatay na mga suspek, tinatayang nasa 30 hanggang 35-anyos, at 40 hanggang 45-anyos ang edad.
Ayon sa ulat ng pulisya, dakong 7 p.m. nang maganap ang insidente sa Orange Fuel gasoline station sa Quirino Highway, Jordan Valley Subdivision, Baesa.
Nauna rito, dumating ang dalawang suspek sakay ng isang motorsiklo at bumaba ang backrider saka nagdeklara ng holdap bago tinutukan ng baril ang kaherong si Jerome Tabora, 20-anyos.
Nagkataong nagpapagasolina ang pulis na si PO2 Cesar Tolentino ng Caloocan City Police District, na hiningan ng tulong ng isang gasoline boy.
Hinikayat ng pulis ang mga holdaper na sumuko ngunit agad sumakay ng motorsiklo tangay ang halagang P530.
Habang papatakas, pinaputukan ng angkas ang pulis kaya gumanti ng putok si PO2 Tolentino na nagresulta sa pagkamatay ng mga holdaper. (ALMAR DANGUILAN)
