Amok na BJMP personnel tigbak sa parak

PATAY ang isang personnel ng Bureau of Jail Management and Penology (BJMP) nang makipagbarilan sa mga pulis makaraan magwala at magpaputok ng baril kamakalawa ng gabi sa Caloocan City.

Agad binawian ng buhay ang suspek na si Alfred Chan, 32, BJMP personnel, at residente ng Block 7, Lot 2, Ruby St., Interville Subd., Talipapa, Brgy. 164 ng nasabing lungsod, sanhi ng maraming tama ng bala sa katawan.

Batay sa ulat nina SPO1 Joselito Barredo, PO2 Edgar Manapat at PO3 Rommel Bautista ng Station Investigation Division (SID) ng Caloocan City Police, dakong 7:10 p.m. nang maganap ang insidente sa tapat ng bahay ng biktima sa nasabing lugar.

Napag-alaman, nagwala ang suspek at nagpaputok ng baril kaya tumawag sa himpilan ng pulisya ang mga residente.

Ngunit habang papalapit ang mga pulis ay agad silang pinaputukan ng suspek.

Gumanti ng putok ang mga pulis na nagresulta sa pagkamatay ng suspek.

Nabatid na lasing ang suspek at sa hindi malamang dahilan ay bigla na lamang nagwala at nagpaputok ng baril.

(ROMMEL SALES)