HATAW! D'yaryo ng Bayan hatawtabloid.com
SUMUGOD sa Times St., malapit sa bahay ni Pangulong Noynoy Aquino ang grupo ng Bagong Alyansang Makabayan bilang pagpapakita ng babala kay PNoy na dapat na totoo at hindi papogi lamang ang gagawing talumpati sa kanyang SONA ngayong araw. (ALEX MENDOZA)
TAMPOK sa ikalimang State of the Nation Address (SONA) ni Pangulong Benigno “Noynoy” Aquino III ngayong araw ang nilagdaang Final Peace Agreement ng gobyerno ng Filipinas at Moro Islamic Liberation Front (MILF).
Magugunitang sa nakaraang SONA ni Pangulong Aquino, ibinida niya ang pagkakalagda ng Bangsamoro Framework Agreement noong Oktubre 2012 na siyang malaking ‘breakthrough’ sa peace process sa Mindanao.
Dito inihayag ng Pangulong Aquino ang kanyang kompiyansang uusad na hanggang malagdaan ang peace agreement sa MILF at maipapasa ang Bangsamoro Basic Law bago matapos ang 2014.
“Umaasa po ako sa pakikiambag ng bawat Filipino sa layunin natin para sa Bangsamoro. Ipakita po natin sa kanilang hindi sila nagkamali sa pagpili sa direksyon ng kapayapaan; ipamalas natin ang lakas ng buong bansa upang iangat ang mga probinsya sa Muslim Mindanao, na kabilang sa mga pinakamaralita nating mga lalawigan,” ani ng Pangulong Aquino sa kanyang ikaapat na SONA noong 2013.
Hindi nabigo si Pangulong Aquino dahil noong Marso 27, 2014, nilagdaan ang Comprehensive Agreement on the Bangsamoro kasama sina MILF chairman Al Haj Murad.
Dito kapwa tiniyak ng dalawang lider ang kanilang commitment para makamit ang ganap na kapayapaan sa Mindanao at mabigyan ng tsansang lumago ang buhay ng mga Bangsamoro base sa kanilang mga prinsipiyo, paniniwala at kultura.
