Puganteng binatilyo kritikal sa boga ng tanod

KRITIKAL sa isang ospital ang puganteng binatilyo nang barilin ng barangay tanod habang pagala-gala sa Navotas City kahapon ng madaling-araw.

Ginagamot sa Jose Reyes Memorial Medical Center (JRMMC) ang biktimang si Yiro Bonita, 16, ng Block 33, Lot 21, Phase 2, Brgy. North Bay Boulevard South (NBBS) sanhi ng isang tama ng bala ng kalibre .38 sa tiyan nang barilin ng suspek na si Pancho Villa, tanod ng nasabing barangay.

Pinaghahanap si Villa na tumakas pagkatapos isagawa ang pamamaril.

Ayon kay SPO1 Belany Dizon, ng Women and Children Protection Desk (WCPD) may hawak ng kaso, dakong 1:00 a.m. nang maganap ang insidente sa Block 39, Martiniko St., ng nasabing barangay nang sitahin ng suspek ang pagalagalang biktima.

Nalaman sa record na ang biktima ay tatlong taon nang wanted matapos tumakas sa Social Welfare Department (SWD) sa pamamagitan ng paglagare sa rehas ng bakal dahil sa kasong pagnanakaw.

Nasangkot din ang biktima sa insidente ng patayan sa Barangay Longos, Malabon City, nitong Pebrero lamang kaya may kinakaharap na arrest order na inisyu ni Judge Emmanuel Laurea, ng RTC/NCJDR Branch 169 noong Hulyo 11. (ROMMEL SALES)