Mabuhay ang Sentenaryo ng Iglesia Ni Cristo

BINABATI po natin ang buong Iglesia Ni Cristo (INC) sa kanilang pagdiriwang ngayon ng ika-100 anibersaryo.

Hangad natin ang panibago pang 100 taon patungo sa pag-unlad at paglawak pa ng INC.

Ang INC ay itinatag ng tinaguriang Sugo at Punong Ministro na si Felix Y. Manalo noong Hulyo 27, 1914 sa Sta. Ana, Maynila.

Nang lumalaki na ang bilang ng mga miyembro ng INC, humirang si Ka Felix ng mga delegado para magpakilala ng Salita ng Diyos sa iba’t ibang lupain, kabilang na ang mga nasa labas ng bansa.

Sa kanyang pagpanaw noong 1963, itinalaga ang mga anak ni Ka Felix na sina Kapatid Eraño Manalo  ang humalili bilang ehekutibong ministro at si Eduardo V. Manalo naman ang hinirang na deputy executive minister.

Sa kasalukuyan mayroon nang 2,635 kongregasyon o lokal sa mahigit 84 bansa at teritoryo sa buong mundo ang naitatag ng Iglesia ni Cristo. Kinilala rin ang Iglesia ni Cristo sa Hawaii at California, dalawang estadong kilala sa dami ng imigranteng Pinoy.

Nitong mga nakaraang taon, nakapagtatag na ang INC ng pabahay gaya ng ‘Tagumpay Village.’ Nagbibigay ng libreng gamutan at serbisyong medikal at dental sa mga proyektong gaya ng Lingap Sa Mamamayan.

Bukod dito, mayroon rin silang mga serbisyong pangkomunidad gaya ng paglilinis ng lansangan, pagtatanim (tree planting project) at pag-dodonate ng dugo.

Ngayong araw, huhugos ang mga opisyal at miyembro ng Iglesia ni Cristo sa Philippine Arena sa Bocaue, Bulacan, para ipagdiwang ang kanilang Sentenaryo.

Alam natin na 99 porsiyento ang dadalo sa okasyong ito ng INC dahil ganyan sila kadisiplinado. At isa ‘yan sa ikinabibilib natin sa mga taga-INC.

Kung mayroon man tayong nababatikos na ilang miyembro nitong nakaraang araw ay hindi para siraan sila kundi para ipaabot sa kanilang pamunuan ang ilang miyembro nila na ‘naliligaw ng landas.’

Pero sa kabuuan, bilib tayo sa praktis ng mga INC. Hindi lang sila puro teorya o Biblia, talagang ipinakikita at isinasabuhay nila ang turo ng kanilang Iglesia.

Kay Executive Minsiter Eduardo “Ka Eddie Boy” Manalo at sa kabuuan ng Iglesia Ni Cristo … binabati ko po kayo … MABUHAY ANG SENTENARYO ng INC.

K – 12 PROGRAM NG DEPARTMENT OF EDUCATION DAPAT LANG SUSPENDIHIN

SANG-AYON tayo sa mungkahi ni Senator Antonio “Sonny” Trillanes IV na isuspendi muna ang K – 12 program ng Department of Education (DepEd) lalo’t hindi pa malinaw kung paano ito ipatutupad.

Hindi rin klaro kung saan kukuha ng budget. Sabi nga ng ibang mga guro, ang napapaboran lang ng budget para sa mga training sa K – 12 program ‘e ‘yung malalapit sa kusina.

Habang ‘yung ibang DepEd officials naman ay sinasabing inabonohan muna ng kanilang eskwelahan ang training ng mga guro para sa K – 12 program.

‘E ‘yung malaking kakulangan sa classrooms, sa upuan, sa libro?!

‘Yung modules ng K – 12 program, tapos na ba? May magagamit na ba ang mga guro?

E ano ba talaga ang totoo, Secretary Armin Luistro?!

May budget na ba talaga ang  K – 12 program o ‘NGANGA’ lang talaga ang mga guro sa programang ito.

Naresolba n’yo na rin ba kung saan mapupunta ang mahigit 86,000 professors and instructors na maawalan ng trabaho dahil dalawang taon mawawalan ng enrollees sa kolehiyo kapag ipinatupad na ang programa?!

What the fact?!

Ito ang problema sa gobyernong Pinoy, gaya-gaya lang sa ibang bansa.

Hindi natin alam kung bakit biglang ipinanganak ang K – 12 program ni Lusitro …

Iniisip ba talaga niya kung ano ang positibong maidudulot n’yan sa sistema ng edukasyon?!

O talagang instrumento siya para lalo pang ‘mabansot’ sa maraming aspeto ng pagkatuto ang kabataang Pinoy?!

ITIGIL ‘yang K – 12 program!

Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com