HATAW! D'yaryo ng Bayan hatawtabloid.com
NAGTALI ng peach ribbon ang mga miyembro ng militanteng grupo sa gate ng House of Representatives sa Quezon City bilang suporta sa inihaing impeachment complaint laban kay Pangulong Benigno Aquino III bunsod ng pagpapatupad ng Disbursement Acceleration Program (DAP). (ALEX MENDOZA)
INIHAIN na kahapon sa Kamara, partikular sa tanggapan ni House of Representatives Secretary General Marilyn Barua-Yap, ang kauna-unahang impeachment complaint laban kay Pangulong Benigno Aquino III.
Pangunahing laman ng reklamo ang sinasabing paggamit ng Pangulo at ng kanyang mga kaalyado sa Disbursement Acceleration Program (DAP) fund na idineklarang unconstitutional ng Korte Suprema.
Umaabot sa 28 katao ang personal na nanumpa bilang complainants ng naturang reklamo.
Agad umani ng suporta mula sa mga militanteng mambabatas ang naturang impeachment at isusulong anila ito sa pagsisimula ng sesyon o pagkatapos ng SONA sa Hulyo 28, 2014.
Suportado ang nasabing reklamo ng mga unang gumawa ng complaint na sina dating Iloilo Rep. Buboy Syjuco at Atty. Oliver Lozano.
(HNT)
PNOY NAGPASARING SA KRITIKO SA INC EVENT
BOCAUE, Bulacan – Sinamantala ni Pangulong Bengino “Noynoy” Aquino III ang inagurasyon ng Philippine Arena ng Iglesia Ni Cristo (INC) para muling magpasaring sa mga kritiko.
Sinabi ng Pangulong Aquino, hindi maiiwasang sa pagtataguyod ng reporma sa bansa, magkakaroon ng mga makakalaban o hahadlang.
Ayon sa Pangulong Aquino, maging ang pagdalo sa okasyon ng INC ay hahanapan ng mali para mabatikos.
Ngunit paalala ni Pangulong Aquino, kung tunay na kapwa Kristiyano, tungkulin na magmahalan sa ngalan ng Panginoon imbes maghasik ng agam-agam at pagkakawatak-watak.
Kasabay nito, puring-puri ni Pangulong Aquino ang kapatiran ng INC at isinasabuhay aniya ng mga miyembro ang aral sa Biblia.
Partikular niyang hinangaan ang bukluran ng kapatiran bilang isang pamilya.
Hinikayat niya ang mga miyembro ng INC na ipagpatuloy ang paglingap sa kapwa lalo sa mga nangangailangan.
Ang bagong bukas na arena ay may floor area na 99,000 square meters at sitting capacity na 55,000.
Nakadisenyo ito laban sa lindol o ano mang kalamidad dahil sa tubular steel columns at napakaraming core shear walls.
Napag-alaman na ginastusan ito ng US$213 milyon o P9.3 bilyon.
