Shabuhan sa BI detention cell

ISANG nakaaalarmang INFO ang ating natanggap na ang Bureau of Immigration (BI) holding facility sa Bicutan ay lantaran na ang pagbebenta ng metamphetamine hydrochloride o mas kilala sa tawag na shabu sa BI detainees.

Isang babae raw ang courier ng shabu na malayang nakalalabas-masok sa loob ng faciliy matapos maghatag ng P10,000 kada delivery.

Napakarami raw parokyano ng babaeng courier sa detention cell. Number 1 raw sa listahan ang mga Koreano at European detainees na adik at suki ng lantarang bentahan ng Shabu.

Ipinapasok daw nila sa bilangguan gamit ang instant cup noodles para hindi obvious na may laman na bato.

Sonabagan!!!

BI Comm. Fred Mison, kailangan tutukan mo na ang security diyan sa BI detention cell.

Madali lang naman malaman kung may katotohanan ang info na ‘yan, ipa-random drug test ang lahat ng detainees pati na ang mga guwardiya ng BI.

Pwede rin siguro i-assign mo muna diyan si  BI Intel officer Jerome Gabionza para mag-monitor ng mga dalaw at magbantay sa detainees bago siya magretiro.

Baka isang araw ay magising na lang tayo na may lutuan o pabrika na rin ng shabu diyan sa BI detention cell, ‘di ba!?

ANONG SUMPA MAYROON ANG MALAYSIA AIRLINES?

HINDI pa nakikita ang Malaysia Airlines Flight 370 (MH370/MAS370), ang international passenger flight mula Kuala Lumpur patungong Beijing na nawalan ng kontak sa air traffic control at naglaho noong Marso 8 dakong 01:20 MYT (17:20 UTC, 7 March) kulang isang oras matapos mag-takeoff. Sakay ng nasabing aircraft ang 12 Malaysian crew members at 227 passengers mula sa 14 bansa.

Ngayon sinundan naman ng pagbagsak ng Malaysia Airlines flight 17 (298 passengers and crew) sa Eastern Ukraine na sinabing pinabagsak ng Kiev rebels na suportado ng Russia.

Sa ikalawang pangyayari, hindi natin alam kung inaalat ba talaga ang Malaysia Airlines o biktima ng malalaking pangyayari sa mundo ngayon gaya ng nagaganap na air strike sa Palestine ng pwersang Israeli at ang nagaganap na etnikong labanan sa Eastern Ukraine.

Una, sinabing ang pagpapabagsak sa MH17 ay sinasadya upang malihis ang international attention sa nagaganap na air strike sa GAZA na ikinamatay na ng hindi mabilang na inosenteng Palestines.

O biktima sila ng pagpapakita ng lakas ng pwersa ni Ukraine junta president Poroshenko?!

Imbestigasyon ng pandaigdigang organisasyon ng iba’t ibang bansa ang makasasagot niyan …

Pero iisa ang malinaw, patuloy ang lumalakas na protesta laban sa mga oligarkiya sa iba’t ibang bansa Europa.

Dahil sa nagaganap sa Ukraine maraming airlines na pala ang umiwas sa nasabing ruta.

Hindi natin alam kung bakit hindi umiwas ang MH17 dito.

Ayon sa report, mas matipid daw sa aviation fuel ang rutang ito na iniiwasan na ng ibang airlines.

Ngayon, nakahanda ang Malaysia Airlines na i-refund nang walang bawas ang lahat ng mga pasaherong naka-book ang flight sa kanila.

Pero hindi ito ang pinag-uusapan dito …

Dapat, alam ng isang airline company kung may panganib sa mga rutang kanilang dinaraanan para hindi madamay ang buhay ng kanilang mga pasahero.

Sa mga kababayan natin  madalas bumiyahe patungo sa Middle East at Europa, mag-ingat po kayo sa mga pipiliin ninyong flights.

Paaalala lang po.

 

Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa JERRYAP888@YAHOO.COM. Para sa mga nakaraang isyu ng BULABUGIN please visit https://hatawtabloid.com