Mukha ng empleyado ng public market binote ng bagets

WASAK ang mukha ng isang empleyado ng public market nang saksakin sa kanang pisngi ng isang high school student na sinabing matagal na niyang kaalitan sa Pasay City, kamakalawa ng gabi.

Si Benjie Daytutos, 37, empleyado ng Pasay City public market, ay isinugod sa Pasay City General Hospital dahil sa saksak ng basag na bote sa kanang pisngi.

Bahagyang nasugatan sa ulo ang suspek na si Ruel Paleracio,18, estudyante ng Pasay City West High School na agad ikinulong nang madakip ng mga awtoridad.

Ayon kay Chief Insp. Angelito de Juan, hepe ng Investigation Detective and Management Section (IDMS), dakong 10:00 p.m. naganap ang insidente sa panulukan ng Park Avenue at Primero De Mayo St.

Naglalakad ang biktima nang makasalubong ang suspek kasama ang isang kaibigan nang biglang sumiklab ang away.

ni JAJA GARCIA