HATAW! D'yaryo ng Bayan hatawtabloid.com
HULING gabi na ngayon ni Anne Curtis bilang si Dyesebel na mas lumalim pa ang pagpapahalaga sa kanyang trabaho dahil sa mga hindi niya malilimutang karanasan habang ginagawa ang top-rating primetime fantaserye ng ABS-CBN.
“Ang dami kong natutuhan dahil sa ‘Dyesebel.’ Dito ko na-realize ko kung gaano ako katatag at kung gaano ko pinahahalagahan itong craft na pinili ko. Kahit na umuulan o bumabagyo, tuloy pa rin kami sa pagtatrabaho dahil ganoon namin kamahal itong ginagawa namin,”pahayag ni Anne kaugnay ng seryeng pinagbidahan niya kasama sina Sam Milby, Andi Eigenmann, at Gerald Anderson.
Ayon pa kay Anne, sulit ang lahat ng pagod at puyat ng cast dahil sa gabi-gabing pagsubaybay ng TV viewers.
“Kakaiba po talaga ang saya kapag naririnig ko na tinatawag ako ng mga tao na Dyesebel. Kasi ibig sabihin, nagmarka na ‘yung character ko sa puso at isip nila,” ani Anne.
Simula nang umere ang Dyesebel noong Marso, gabi-gabi na itong nagreyna sa national TV ratings dahil sa mga kapana-panabik na tagpo sa buhay ni Dyesebel kasama sina Fredo (Gerald), Liro (Sam), at Betty (Andi), at sa mga mahahalagang aral na ibinahagi nito tungkol sa pangangalaga sa kalikasan.
Bahagi rin ng powerhouse cast ng Dyesebel sina Dawn Zulueta, Gabby Concepcion, ZsaZsa Padilla, Gina Pareño, at AiAi delas Alas mula sa direksiyon nina Don Cuaresma at Francis Pasion, at produksiyon ng Dreamscape Entertainment Television.
