Willie, ‘di pa sure kung magiging host ng Talentadong Pinoy (Dahil sa napakaraming demands…)

HINDI pa pala tiyak kung si Willie Revillame na nga ang magiging host ng Talentadong Pinoy kaya nagtataka ang ilang TV5 executive sa mga nababasa nila sa pahayagan.

Kuwento mismo ng TV5 executive sa amin na ayaw ipabanggit ang name, “ano ba ‘yun, hindi pa nga sure, eh. Under negotiations pa rin kasi may mga gusto si Willie na hindi agree ang management kaya nag-uusap pa rin.”

Kaya pala hindi masabi ni Ms. Wilma V. Galvante kung sino ang host ng TP ng huli namin siyang makatsikahan sa presscon ng Face The People dahil wala pa silang nakukuha.

Marami raw demands si Willie bagay na hindi pabor ang management kaya’t hindi matapos-tapos ang meeting nila at dahil sa Setyembre pa ito eere ay may mahigit isang buwan pa ang TV5 management kung pagbibigyan nila ang TV host o tuluyan na itong pakakawalan.