HATAW! D'yaryo ng Bayan hatawtabloid.com
MATINDING hamon ang ibabato ng Arellano Chiefs sa defending champion San Beda Red Lions sa kanilang pagtutuos sa 90th National Colegiate Athletic Association (NCAA) men’s basketball tournament mamayang 2 pm sa The Arena sa San Juan .
Ang Chiefs ay sinasabing isa sa mga powerhouse teams ng torneo at malamang na magbigay ng magandang laban sa Red Lions.
Hawak ngayon ni coach Jerry Codinera na humalili kay Koy Banal bago nagsimula ang torneo, ang Arellano ay nagposte ng magkasunod na panalo kontra Lyceum Pirates (93-80) at Emilio Aguinaldo College Generals (80-73).
Subalit mas matindi ang simula ng Red Lions ni coach Teodorico Fernandez III dahil nakapagrehistro na sila ng tatlong panalo.
Kabilang sa mga biktima ng San Beda ang Jose Rizal Heavy Bombers (57-49), Mapua Cardinals (89-55) at Lyceum Pirates (84-68).
Ang Chiefs ay may dalawang bagong big men sa katauhan ng Fil-Am na si David Ortega at Amerikanong import na si Dioncee Holts.
Nakakatuwang ng mga ito ang mga beteranong sina Prince Caperal, John Pinto at Levi Hernandez at nagbabalik na sina Christian Palma at Isaiah Ciriacruz.
Magbabalik naman sa active duty para sa Red Lions si Art dela Cruz matapos na masuspindi bunga ng panununtok kay Jason Cantos sa laro kontra Mapua.
Main man ni Fernandez si Olaide Adeogun na tutulungan nina Kyle Pascual, Baser Amer, Anthony at David Semerad.
Sabrina Pascua
