HATAW! D'yaryo ng Bayan hatawtabloid.com
DALAWANG obrero ang namatay nang bumagsak mula sa ikawalong palapag ang sinasakyan nilang Spider lift habang gumagawa sa gusali ng Mall of Asia (MOA) Arena sa Pasay City kamakalawa ng gabi.
Agad namatay bago makarating sa San Juan De Dios Hospital sanhi ng pagkabale ng mga buto at mga sugat sa katawan sina Ronaldo Caballero, 29; Segrid Puntalan, Jr., 28, pawang maintenance, ng 123 Indese Compound, Road 12, Sta Mesa, Maynila.
Bandang 7:00 p.m. nang maganap ang insidente sa MOA Arena.
Nag-aayos ang mga biktima sa LED Mesh sa ikawalong palapag nang magkaaberya ang kinalalagyan nilang taklobo (spider lift) na mabilis bumulusok.
May teorya ang pulisya na bumigay ang sinasakyang taklobo ng mga biktima habang kinu-kumpuni ang Led Mesh.
Nagsasagawa ng imbestigasyon ang mga awtoridad sa insidente.
(JAJA GARCIA)
