HATAW! D'yaryo ng Bayan hatawtabloid.com
NAMATAY ang isang sanggol na lalaki at 4-anyos niyang kuya nang matupok ang kanilang bahay dahil sa nag-overheat na ceilign fan sa Sibonga, Cebu kamakalawa ng hapon.
Kinilala ang mga biktimang sina Ezekiel Gab Sarnillo, 4-anyos, at Philip Hanz, isang taon gulang.
Batay sa ulat ng pulisya, dakong 3 p.m. nang maganap ang sunog sa bahay ng pamilya Sarnillo sa Brgy. Bato sa Sibonga, Cebu.
Ayon sa ina ng mga biktima na si Gemma, natutulog ang kanyang mga anak kaya’t naisipan niyang umigib at bumili ng mga kailangan nilang gamit habang ang kanyang asawang si Armando ay nasa trabaho bilang gwardya sa Cebu City at ang dalawa pang mga anak ay nasa paaralan.
Nagulat na lamang aniya siya nang pagbalik sa bahay ay nasusunog na ito at hindi na nailabas pa ang mga bata.
Sa inisyal na imbestigasyon, nag-overheat ang ceiling fan sa bahay ng mga biktima na naging sanhi ng sunog.
ni DANG GARCIA
