Pagbili ng prangkisa kinompirma ng NLEX

KOMPIYANSA ang North Luzon Expressway na matatapos na sa mga darating na linggo ang balak nitong bilhin ang isang koponan ng PBA at makalaro na sa susunod na season ng liga.

Sinabi ng team manager ng Road Warriors na si Ronald Dulatre na ihahayag niya ang koponang balak nilang bilhin kapag natapos na ang kampanya ng nasabing koponan ngayong PBA Governors’ Cup.

“Right now, we’re focusing na lang ‘dun sa isa (na team),” wika ni Dulatre sa panayam ng programang PTV Sports noong isang araw. “With respect dun sa target team namin, we’ll just wait for their last game sa Governors Cup para naman maganda ‘yung result.”

Hindi sinabi ni Dulatre kung ano ang koponang balak ibenta ang prangkisa sa NLEX ngunit ayon sa ilang mga sources,   nakikipag-usap ngayon ang Road Warriors sa kahit sino sa Air21 o Alaska.

Dahil sa pangyayaring ito, magiging 12 at hindi na 13 ang mga koponang kasali sa PBA sa darating na ika-40 season na magbubukas sa Oktubre.

Naunang nakapasok bilang expansion teams ang Blackwater Sports at Kia Motors pagkatapos na parehong nagbayad ng franchise fee na P100 milyon.

“We feel na hindi namin magagawa yun (maging competitive) kung hindi kami magkakaruon ng direct hire, so we resorted to buying an existing franchise,” ani Dulatre.

Kapag nakumpleto na ng NLEX ang pagbili ng prangkisa sa PBA, kailangan itong aprubahan ng PBA board of governors.

(James Ty III)