HATAW! D'yaryo ng Bayan hatawtabloid.com
SINANG-AYONAN ng Malacañang ang pahayag ng Presidential Commission on Good Government (PCGG) na mahihirapang mabawi ang mga ninakaw ng tinaguriang pork barrel scam queen na si Janet Lim-Napoles.
Una na rito, sinabi ni PCGG chairperson Andres Bautista, magiging matagal ang proseso ng pagbawi dahil diringgin sa korte ang kaso at asahan ang sangkaterbang apela na ihihirit ng kampo ni Napoles bukod sa posibleng naitago na sa ibang pangalan ang mga ari-arian at maaaring nasa ibang bansa na.
Sinabi ni Communications Sec. Sonny Coloma, bagama’t totoo ang sinasabi ng PCGG, patuloy na gagawa ng paraan ang pamahalaan upang mabawi ito.
Ani Coloma, handa silang makipag-ugnayan sa lehislatura upang pag-usapan kung nararapat nang amyendahan ang ilang batas upang mapadali ang pagbawi ng pondong ninakaw sa bayan.
(ROSE NOVENARIO)
