Blackwater tatawag ng tryout

MAGKAKAROON ng tryout ang Blackwater Sports sa susunod na linggo para maghanap ng mga manlalarong makakasali sa lineup nito bilang baguhang koponan sa PBA sa bagong season na magsisimula sa Oktubre ng taong ito.

Gagawin ang tryout sa Hunyo 24 at 26 mula alas-9 ng umaga hanggang alas-12 ng tanghali sa SGS Gym sa Araneta Avenue, Quezon City.

Sinabi ni coach Leo Isaac na bukas ang tryout sa mga free agents at mga nais na magpalista sa PBA draft sa Agosto 24.

“Kasi kailangan din nila ‘yun dahil malapit na ang draft. At least masisilip na sila ng tao,” wika ni Isaac.

Naunang nagpa-tryout ang isa pang baguhang Kia Motors ilang linggo na ang nakararaan sa Sta. Lucia East Gym sa Cainta sa ilalim ng head coach nilang si Manny Pacquiao.

Nais naman ni Blackwater team owner Dioceldo Sy na makuha niya ang ilang mga manlalaro niya sa PBA D League tulad nina Pari Llagas, Bacon Austria, Allan Mangahas, Reil Cervantes at Gilbert Bulawan dahil lahat sila ay free agents at puwedeng maglaro uli sa PBA.

“Maybe, in our first conference, we’ll give our Blackwater free agents a chance to play. We’ll be patient in our first year but we want to be able to build a competitive team by the second and third years,” ani Sy.

Samantala, tuloy ang expansion draft para sa mga manlalarong nais kunin ng Blackwater at Kia sa Hulyo 18 sa opisina ng PBA sa Libis, Lungsod ng Quezon.

“We’ll settle the dispersal picks on July 18,” ani Marcial.

Hindi na sasali sa expansion at dispersal draft ang NLEX dahil inaasahang bibilhin nito ang isang kasalukuyang koponan sa PBA na hindi pa pinangalanan.   (James Ty III)