Nasabat na pekeng signature shoes ng MPD nawawala?

NAWAWALA ang nasabat ng Manila Police Distirct (MPD) na isang closed van na naglalaman ng mga pekeng sapatos sa Binondo, Maynila kamakalawa.

Ito ang ibinunyag ng source, na dakong 2:00 pm nasakote ng MPD – District Special Operation Unit 1 ang nasabing closed van na naglalaman ng kargamento.

Pero matapos ang balita, hindi nakarating sa headquarters ng MPD sa United Nations Avenue, ang nahuling closed van maging ang driver at pahinante nito.

Nabatid na mismong si MPD Director, Chief Supt. Rolando Asuncion ay nagulat nang makarating sa kanya ang impormasyon na ‘missing’ ang mga nasabat na kargamento ng kanyang mga tauhan.

Dahil dito, inatasan ni Asuncion ang team leader ng DSOU Team 1 na magsumite ng report kung bakit hindi nakarating sa headquarters ng pulisya ang nasabat na pekeng sapatos.

Nagpalabas agad ng 24-oras na taning si Asuncion upang magsumite ng paliwanag ukol sa ‘nawawalang’ kargamento. (LEONARD BASILIO)