Kelot nahulog sa MRT walkway, tigok

TODAS ang isang hindi nakilalang lalaki matapos mahulog mula sa walkway ng MRT Bonifacio Station sa Mandaluyong City kahapon.

Ayon kay Roel Teves, tauhan ng Metropolitan Manila Development Authority (MMDA), mismong sa gitna ng northbound lane ng EDSA nahulog ang ‘di kilalang lalaki na nasa pagitan ng edad 30 hanggang 40-anyos. Nakasuot ng shorts at bahagyang marumi ang itsura.

Ayon sa security guard ng MRT, nakaupo sa walkway ang biktima kaya sinita niya dahil nakasasagabal pero pagtayo ay na-out of balance at tuluyang nahulog.

Masusing imbestigasyon ang isinasagawa ng mga awtoridad sa insidente habang ina-alam din kung may pananagutan ang sekyu o ang management ng MRT.

ni ED MORENO