HATAW! D'yaryo ng Bayan hatawtabloid.com
TODAS ang tatlo katao habang sugatan ang dalawang pulis sa naganap na sagupaan ng dalawang armadong grupo
sa Sitio Nazareth, Brgy. Amas, Kidapawan City kamakalawa.
Kinilala ang mga namatay na sina Aurelio Calugmatan, 36, at Ramboy Balimba, 17, kapwa residente ng Sitio Nazareth, at ang PBAT member na si Bonie Vicente.
Habang sugatan ang dalawang pulis na sina Insp. Randy Apostol at SPO1 Edwin Maguate.
Napag-alaman, inatake ng mahigit sa100 armadong kalalakihan mula sa Patadon, Matalam, North Cotabato, ang mga residente ng Sitio Nazareth na naging dahilan ng palitan ng putok ng mag-kabilang panig.
Nang mamagitan ang mga pulis sa nasabing sagupaan ay pinaputukan din sila ng armadong grupo dahilan ng pagkamatay ng BPAT at pagkasugat ng dalawang pulis.
Agad dumating si MILF Local Monitoring Team Chief Jabib Guiabar at napahupa ang nasabing sagupaan at pinag-usapan ang gusot ng dalawang pangkat na naglalaban.
Binuo ni Cotabato Gov. Emmylou Mendoza ang crisis committee na tutugon sa nasabing girian.
Sinasabing pinag-aagawan ng dalawang grupo ang lupang pagmamay-ari ng gobyerno.
Ang matagal nang ina-angkin ng dalawang grupo ay ang Central Mindanao Integrated Agricultural Research Center (CEMIARC) ng Department of Agriculture (DA). (BETH JULIAN)
