P1-M cash, alahas nasikwat sa Japayuki

Tinatayang mahigit P1 milyong halaga ng cash, alahas at iba pang gamit ang natangay ng magnanakaw sa bahay ng isang dating entertainer sa Japan sa Sampaloc, Maynila.

Sa salaysay ng biktimang nagpatago sa pangalang “Candy,” nagsimba siya kasama ang ilang kaibigan pero pagbalik niya, nagulat siya nang makitang sira na ang lock ng pinto ng kanyang bahay.

Bagamat bukas na ang aparador, wala umanong bakas na hinalughog ang loob ng bahay.

Natangay ng suspek ang isang bag na naglalaman ng milyong-pisong halaga ng alahas, cellphone at mamahaling relo.

Nagtaka ang biktima kung bakit iniwan ng suspek ang laptop, camera, at mamahaling gadget na katabi ng tinangay na mga kagamitan.

Palaisipan din kung bakit tila tukoy ng suspek ang pinaglalagyan ng mga alahas ni “Candy” na naipundar niya mula sa pagtatrabaho bilang entertainer sa Japan.

Lumabas sa imbestigasyon ng barangay na isang lalaki ang suspek sa krimen pero blanko pa ang mga awtoridad sa pagkakakilanlan.