HATAW! D'yaryo ng Bayan hatawtabloid.com
BINIGYANG-DIIN ni PhilHealth President/CEO Alex Padilla na hindi kinakatawan ni Dr. Rustico Jimenez ang buong Private Hospitals Association of the Philippines (PHAP).
Sa harap ito nang banta ni Jimenez na maaaring hindi na kilalanin ng kanilang mga miyembro ang PhilHealth card ng mga pasyente kung hindi mababayaran ng PhilHealth ang pagkakautang sa mga pagamutan.
Sinabi ni Padilla, katunayan ay itinanggi ng PHAP sa Visayas na kaisa sila sa nasabing banta ni Jimenez.
Ayon kay Padilla, may pananagutan ang mga ospital na tatanggi sa mga pasyenteng PhilHealth card holders.
Kabilang aniya sa maaaring pananagutan o parusa sa mga magmamatigas na ospital ang “pagkaka-blacklist” sa PhilHealth at pagpawalang-saysay sa kanilang lisensya.
Taliwas sa babala ni Jimenez, wala pa aniya silang natatanggap na reklamo mula sa mga pasyente na tinanggihan sila ng pribadong pagamutan.
