Lola, sanggol patay sa ipo-ipo

KIDAPAWAN CITY – Nag-iwan ng dalawang patay at isang sugatan ang malakas na ipo-ipo na tumama sa North Cotabato dakong 5 p.m. kamakalawa.

Kinilala ang mga namatay na sina Princess Jelyn Tubal, 5-buwan gulang, at Teresita Murillo, 53, habang sugatan si Danny Asinas, 46, pawang mga residente ng Sitio Mauswagon, Brgy. Salunayan Midsayap North Cotabato.

Ayon sa ulat ng pulisya, nagpapahinga ang mga biktima sa loob ng kanilang bahay nang biglang mabuwal ang mga puno ng mangga at niyog dahil sa lakas ng ulan at hangin.

Nakaligtas si Asinas nang makatakbo habang binawian ng buhay ang maglola nang mabagsakan ng mga puno.

Kwento ng ilang mga nakasaksi, maaaring ipo-ipo ang tumama sa kanilang lugar dahil sa lakas nito ay nabuwal ang mga puno ng niyog, mangga at iba pa. (HNT)