Mangingisda todas sa lapa ng buwaya

PATAY ang isang mangingisda nang lapain ng buwaya kamakalawa ng gabi sa ilog ng Sitio Marabajay sa Bataraza, Palawan.

Kinilala ang biktimang si Rommel Siplan, 30, residente ng bayan ng Bataraza.

Ayon sa ulat ni Ensign Grenata Jude, PIO ng Coast Guard District Palawan, nangyari ang insidente sa ilog sa nabanggit na lugar.

Agad nagresponde ang patrol boat ng Coast Guard at nadatnan ang bangka na palutang-lutang habang nasa gilid ang buwaya at sakmal pa ang mangingisda.

Nagpaputok ang mga tauhan ng Coast Guard hanggang sa bitiwan ng buwaya ang katawan ng biktima.

“Nakita ang isang bangka na palutang-lutang at nang mailawan nasa gilid ‘yong buwaya na kagat-kagat na nga po ‘yong biktima,” ani Lt. Jude. “Pinaputukan po ‘yong buwaya at agad-agad namang nabitawan ng buwaya ang kanyang biktima. Na-turnover na rin namin ang bangkay sa local PNP sa area.”

Ayon kay Jude, batid na may gumagalang buwaya sa area ngunit sa kanilang teorya ay baka napadpad lamang doon ang biktima. Ang ilog aniya ay karugtong ng karagatan sa lugar.