HATAW! D'yaryo ng Bayan hatawtabloid.com
HINULIDAP ng dalawang pulis ang isang American national habang namamasyal sa Ermita, Maynila, kamakalawa.
Nagtungo sa MPD General Assignment Section ang Kanong kinilalang si Adam Miller, 54, naka-check in sa 408 Sogo Hotel, A. Mabini St., Ermita, upang ipa-blotter ang insidente.
Hindi natukoy ng biktima ang pagkakakilanlan sa dalawang pulis na inilarawang nakasuot ng kulay asul na PNP patrol shirt, nakasakay sa isang SUV na goldish-brown na ang plaka ay for registration.
Sa imbestigasyon, dumating sa Maynila si Miller kamakalawa, nag-check in sa nasabing hotel at matapos maka-pagpahinga ay nagpasyang mamasyal sa paligid.
Dakong 3:30 p.m. habang naglilibot sa paligid ng A. Mabini St., Ermita, nilapitan siya ng dalawang pulis na may mga nakasukbit na baril, sinita saka hinanap ang kanyang pasaporte na kaniya agad naipakita.
Hhindi pa nasiyahan ang dalawang ‘pulis’ kaya sila na ang kumalkal sa bitbit na bag ng Kano.
Nang matapos halungkatin ng mga suspek ang kanyang bag ay saka siya iniwan at nang kanyang bulatlatin nawawala na ang kanyang US$4,000.
Ang biktima ay sinamahan ng mga nagpa-patrol na tourist police sa MPD headquarters upang ipa-blotter ang pangyayari.
(leonard basilio)
