Nagnakaw ng panabong kinuyog ng 8, dedbol

PATAY sa bugbog ng walong ‘di kilalang suspek ang isang lalaki nang maaktohang ninanakaw ang panabong na manok, sa Pasay City kahapon ng madaling araw.

Inaalam ng pulisya ang pagkakakilanlan ng biktima na inilarawan nasa edad 45 hanggang 50, may taas na 5’2 hanggang 5’4, payat ang pangangatawan, kayumanggi, naka-asul na t-shirt at pantalong maong.

Sa ulat na tinanggap ni Insp. Jose Mari Jasmin, deputy officer ng Investigation Detective & Management Section (IDMS) natagpuan ang bangkay ng biktima dakong 4:00 a.m. sa loob ng Sgt. Mariano Cemetery, Brgy. 148, Zone 16.

Ayon sa isang Richard Enriquez, 24, caretaker ng sementeryo, dakong 3:00 a.m. nakita ang biktima na may dalang panabong na manok habang hinahabol ng walong lalaki na sumisigaw ng “magnanakaw, magnanakaw” at nang abutan saka pinagtulungang gulpihin.

Natagpuan ang labi ng biktima ng mga opisyal ng barangay sa sementeryo at inaalam kung ang kanyang mga kaanak.

(JAJA GARCIA)