Gerald Anderson lalaro sa Filoil Tourney

KINOMPIRMA ng head coach ng Holy Trinity University ng General Santos City na si Pol Torrijos na lalaro sa kanyang koponan ang aktor na si Gerald Anderson sa susunod na laro ng Wildcats kontra University of the Philippines sa Filoil Flying V Pre-Season Premiere Cup sa Sabado, Mayo 17, sa The Arena sa San Juan.

Ayon kay Torrijos, dating manlalaro si Anderson sa high school team ng Wildcats at may balak siyang maglaro sa pagsisimula ng liga nila sa Mindanao ngayong school year.

“Hindi ako sigurado kung in shape si Gerald,” wika ni Torrijos. “Ngunit sa tingin ko, maganda para ma-boost ang morale ng team namin.”

Dapat sanang maglaro at mag-aral si Anderson sa Ateneo de Manila ngunit hindi siya natuloy dahil sa kanyang pagiging artista.

Nag-tryout din si Anderson para sa NLEX Road Warriors ng PBA D League.

May tatlong sunod na pagkatalo ang HTC sa torneo pagkatapos na tambakan ng College of St. Benilde ang Wildcats, 106-92, noong Linggo sa Gatorade Hoops Center sa Mandaluyong. (James Ty III)