Pacquiao ihahanda ang coaching staff ng Kia

DESIDIDO ang Pambansang Kamao na si Manny Pacquiao na magtatag ng malakas na koponang Kia Motors para sa unang pagsabak nito sa Philippine Basketball Association sa susunod na season.

Ayon sa isang source na malapit kay Pacquiao, kukunin niya sina Glenn Capacio at Ariel Vanguardia bilang mga assistant coaches samantalang ang business manager ng boksingero na si Eric Pineda ay magiging team manager ng Kia.

Si Pacquiao ang magiging playing coach at nakatakda siyang pumirma ng tatlong taong kontrata sa Kia anumang araw mula ngayon.

Nais ni Pacquiao na sundan ang yapak ni Robert Jaworski na naging playing coach ng Barangay Ginebra San Miguel mula 1985 hanggang 1998.

Ngunit binanggit din ng source na mapipilitan ang Kia na gawing head coach na lang si Pacquiao dahil nga hindi siya puwedeng maglaro sa liga kung hindi siya dadaan sa rookie draft.

(James Ty III)