HATAW! D'yaryo ng Bayan hatawtabloid.com
PINAIIMBESTIGAHAN ng isang grupo ng mga magsasaka sa Pangasinan ang isang babaeng opisyal ng National Irrigation Administration (NIA) dahil sa umano’y biglang pagyaman tulad ni Janet Lim –Napoles at napapabalitang nalululong na sa casino gabi-gabi.
Ayon kay Samahan ng mga Magbubukid ng Binmaley (SMB) President Rogelio Cruz, makikipag-ugnayan sila kay Sec. Francis “Kiko” Pangilinan, ang bagong natalagang Presidential Assistant on Agriculture and Food Security Management, para maimbestigahan agad ang opisyal na kilala sa tawag na “Donya Rosario.”
Sinabi ni Cruz na nagtataka lamang sila na hindi naman mayaman ang kanilang kababayan na si Donya Rosario pero tila biglang naging marangya ang buhay nang makapasok sa NIA, may limang taon pa lamang ang nakalilipas.
Dagdag ni Cruz, kontodo alahas na pawang mga brilyante pa umano ang suot mula tenga, leeg, kamay, daliri at bukong-bukong araw-araw sa pagpasok sa opisina kaya siya pinag-uusapan araw-araw sa NIA.
Kataka-taka rin aniya ang kakayahan na bumili ng bagong sasakyag Jaguar gayong kakarampot lamang ang suweldo niya sa NIA.
Nais ni Cruz na paimbestigahan agad ni Sec. Pangilinan ang ulat na madalas umanong mag-casino ang naturang opisyal, na mahigpit na ipinagbabawal sa mga opisyal ng pamahalaan.
Ipinasisilip rin ng mga opisyal ng SMB at ikompara ni Pangilinan ang statement of assets, liabilities and net worth (SALN) noong bago siya pumasok sa NIA at ang bagong SALN nitong 2012 at 2013.
Naiinis ang kanyang mga kababayang magsasaka dahil sa tinagal-tagal na raw niya sa NIA ay hindi man lang niya natulungan ang kanilang lugar para gumanda ang kanilang irrigation system na ngayon ay sisinghap-singhap na. (HNT)
