HATAW! D'yaryo ng Bayan hatawtabloid.com
PATAY ang isang barangay kagawad habang sugatan ang kanyang misis, at patay rin ang isang lalaki habang sugatan ang babaeng kanyang katabi makaraan pagbabarilin ng hindi nakilalang mga salarin sa magkahiwalay na insidente sa Caloocan City.
Ito ay isang araw lamang makaraan ang naganap na pagpaslang 66-anyos dating hepe ng Department of Public Safety and Traffic Management (DPSTM) na si Eduardo Balanay sa nasabing lungsod.
Hindi na umabot nang buhay sa Dr. Jose N. Rodriguez Hospital ang biktimang si Brgy. 181 Kagawad Garry Moralla, 26, sanhi ng maraming tama ng bala ng kalibre .9mm, habang sugatan sa kamay ang misis niyang si Jonalyn, 27, admin assistant, ng #309 Libra St., Pangarap, makaraan pagbabarilin ng riding in tandem kamakalawa ng gabi.
Batay sa ulat ni PO3 Anthony Cruz, dakong 10 p.m. habang naglalakad ang dalawa sa Gemini St. ng nasabing barangay nang bigla silang pagbabarilin ng mga suspek.
Sa teorya ng pulisya, maaaring ang krusada ng biktima laban sa droga ang motibo sa krimen.
Samantala, hindi na umabot nang buhay sa Valenzuela General Hospital (VGH) ang biktimang si Reymon Gallego, 33, ng #31179 Avocado St., Bagbaguin ng nasabing lungsod, habang nilalapatan ng lunas si Anie Batrina, 19, ng Gen. T. de Leon, Brgy. Karuhatan, Valenzuela City, makaraan pagbabarilin sa loob ng Piso Net shop sa Jose Compound, NY, Bagbaguin ng lungsod.
Mabilis na nakatakas ang suspek lulan ng motorsiklo na hindi naplakahan makaraan ang krimen.
Iniimbestigahan ng mga awtoridad ang posibleng motibo at mga suspek sa dalawang insidente.
(ROMMEL SALES)
