Opisyal ng NPA arestado sa Pasig

ARESTADO ang  opisyal ng New People’s Army (NPA) sa magkasanib na puwersa ng PNP, AFP at CIDG kahapon ng madaling araw sa lungsod ng Pasig.

Sa ulat, kinilala ni Supt. Mario Rariza, ang nadakip na si Stanley Malaca, nasa hustong gulang, nakatira sa Brgy. Pinagbuhatan sa lungsod.

Natimbog si Malaca sa isinagawang operasyon ng Philippine National Police-Criminal Investigation and Detection Group (PNP-CIDG) at 95th Infantry Division Armed Forces of the Philippines (AFP) sa bisa ng arrest warrant na inilabas ni Judge Noel Paulite.

Ayon sa record ng PNP, ang suspek ay may kasong double murder, kilala rin bilang “Commander Jamay” at “Angel” ng Committee 2 Larangan Guerilla 77, Bicol Regional Party Committee.

Si Malaca rin ang itinuturong suspek sa pagpatay kay Sergeant Valencia, at isang Private Alcantara ng Philippine Army noong Pebrero 9, 2011 sa Bula, Camarines Sur.          (ED MORENO)