Korupsiyon sa Media laganap — Teodoro

SA kabila ng pagpupursigi ng administrasyong Aquino na walisin ang korupsyon, patuloy pa rin lumalaganap ito hindi lamang sa pamahalaan kundi maging sa hanay ng media.

Ito ang pananaw ni dating dean ng University of the Philippines College of Mass Communication Luis Teodoro sa pagtalakay sa kalagayan ng Philippine media at usapin ng malayang pamamahayag sa bansa.

Ayon kay Teodoro, ang pangunahing problema ngayon ng lokal na media ay ang pagdami ng mga mamamahayag na walang sapat na training o dili kaya’y mali ang naging pagsasanay at karanasan para ituring na tunay na miyembro ng media.

“Dito nag-uugat ang ethical questions ukol sa kanilang pagtupad ng kanilang tungkulin dahil hindi nila matukoy kung ano ang dapat na gagawin sa isang sitwasyon na sumasalungat sa mga alituntunin ng pagiging mamamhayag,” punto niya sa linggohang Tapatan sa Aristocrat media forum.

Sinusugan ito ni Philippine Institute for Development al Studies (PIDS) public affairs chief Rommel Lopez, na nagsabing sa realidad ay laging nakokompromiso ang trabaho ng media sanhi ng laganap na korupsyon sa loob mismo ng news room.

“Kapag nasa editorial ka, ang umiiral ang nais ng may-ari ng pahayagan, radio o telebisyon. Ang totoo, the name of the game ay compromise,” ani Lopez.

May ilang media organization na pinaniniwalaang mismong mga lider nila ay kinokompromiso ang buong organisasyon sa interes ng ilang politiko.