Boracay event dapat bantayan ng PDEA

AAPAW na naman pala ang party-goers na sumibsib sa Boracay ngayon May 3 at bukas May 4.

Patok na patok raw talaga itong “Tattoo Labor Day Weekend 2014” sponsored by Globe Tattoo and hosted by Republiq.

Kung noong isang taon ‘e dinayo ng sandamakmak na locals at turista sa Boracay ang ganitong event, ngayon ‘e tiyak doble pa o mas higit ang bilang.

Ngayon hanggang bukas, ang event na ito pero nitong Huwebes at Biyernes ng gabi  pa lang ‘e dinayo na ng ‘shaded’ party-goers ang event.

Kumbaga, tirik na trik ang buwan, ‘e nakasuot pa ng shades ang mga nagsipunta … halata tuloy na ‘kargado’ sila.

Naalala natin ‘yung event sa Angeles City, Pampanga nitong nakaraang Pebrero na mayroon pang nahuling drug-users.

Marami ang nagsabi sa atin na tila magiging isang malaking party ng mga ecstacy users ang event sa Boracay kaya may mga nakasuot ng shades (sunglasses) kahit walang sikat ng araw (gabi na).

Tsk tsk tsk …

Paging Philippine Drug Enforcement Agency (PDEA) may mga enforcers ba kayong ini-deploy sa Boracay?

O baka naman, nakasuot na rin sila ng ‘shades’ kahit nakatirik ang buwan?!

Paki-check na nga ng mga tao ninyo sa Boracay, PDEA director general, USec. Arturo Cacdac, Jr.

PNR CHARTER  DAPAT PA BANG PALAWIGIN?!

MAYROON kagyat na tungkulin ngayon ang lehislatura at ehekutibong sangay ng pamahalaan.

Kailangan mag-brainstorming ang dalawang sangay kung itutuloy o idi-dissolve na nang tuluyan ang charter ng Philippine National Railways (PNR).

Batay sa Republic Act 4126, ang charter ng PNR ay mapapaso sa Hunyo 20, 2014.

Wala pang posisyon ang Executive branch kung ii-extend ang charter.

Ayon kay Senator Recto, kung hindi palalawigin ang PNR Charter, isinasaad sa RA 4126 na sa loob ng tatlong (3) taon, kailangan ihanda ang dissolution at kung paano idi-dispose ang properties ng PNR kabilang na ang napakalawak na lupain gayon din ang air rights sa mga lupaing nasasakop nito.

Kung aayusin sanang mabuti ang ating rail system, malaking kaginhawaan ito sa sambayanang Pinoy.

Pero kung ‘bubulukin’ lang ito ng mga namamahala sa PNR, e mabuti pang huwag nang palawigin ang Charter at isapribado na lamang ang operasyon nito.

Naalala ko pa noong panahon ng aming kabataan, kapag nagbabakasyon ang buong pamilya namin sa Lucena City, ang sinasakyan namin ay air conditioned na PNR train sa Blumentritt station at ang biyahe namin ay inaabot lamang ng tatlong oras.

Malaking kawalan sa sambayanang commuters kung mawawala ang PNR pero nakasasama naman ng loob na sa buong rail system sa buong mundo na naging moderno at maganda, bukod tanging ‘yung sa atin lang ang naging DILAPIDATED.

Habang  ‘yung railroad system sa ibang bansa ay umunlad nang ununlad at naging bullet train pa nga.

ONLI in da Pilipins lang talaga!

PNP-ASG PROTOCOL TEAM SINIBAK SA NAIA T-3 NI CHIEF PNP

SA nakaraang Holy week, sumambulat na parang pin balls ng bowling ang grupo ng tinaguriang protocol team ng PNP-Aviation Security Group sa NAIA Terminal 3.

Sinibak silang lahat! Anyare!?

Ito ay makaraang masaksihan ng isang mataas na opisyal ng pamahalaan ang ginagawang pamamalengke ng nabanggit na grupo sa mga itinuturing nilang VIP passengers, lalo na ang mga Filipino-Chinese traders na galante pagdating sa mga pagkakataong binibigyan sila ng importansiya sa airport.

Batay sa impormasyong nakalap natin, Miyerkoles Santo nang maganap ang nakahihiyang insidente na isang Tsinoy gambler ang dumating at ang sabi ay nanalo pa sa pustahan sa Pacquiao-Bradley Rematch.

Ayos!

Bilang bahagi ‘kuno’ ng port courtesy ay naghandog ng serbisyo ang grupo ng mga tulisan ‘este’ grupo ng pulis na umalalay sa pasaherong Tsinoy. Pero ang masaklap ay halos maubos ang mga pulis sa kanilang poste at nagmistulang anino na susunod-sunod at nakatanghod sa Tsinoy gambler para mabigyan ng pakimkim.

Malas lang nila dahil  isang top government official ang nakakita sa kalokohan nila kung kaya personal niyang ipinagbigay-alam kay PNP Chief, Director General Allan Purisima ang raket nila.

Mabilis na nag-order si Chief PNP na sibakin at i-recall ang grupo ng PNP-ASG ‘SALUBONG BOYS’ sa NAIA T-3 at pinalitan sila ng rookie cops at lady cops.

Sabi ng ilang non-uniformed personnel at security forces ng NAIA T3, regular na aktibidad na umano ng ilang pulis ang pamamasahero. Tinukoy nila ang isang alias ‘PO1 Gulang ‘este’ Galang’ na garapalan pa umano kung ‘mamalengke’ ng VIP departing passenger kahit pa nakapila na ay walang patumanggang kukunin/bubunutin sa pila ni PO1 Galang ang pasahero at mag-o-overtake in full view of the passengers at the queuing area na ikinaiirita ng mga kababayan natin at banyagang sumusunod sa mahigpit na patakaran ng airport authorities.

Pero talagang kahit saang labanan ay nananaig pa rin ang kabutihan kaysa kasamaan kung kaya’t tinuldukan na ni Chief PNP ang masama o hindi tamang nakaugaliang gawain ng ilang kasapi ng pambansang pulisya.

Ayos ka Chief PNP!

 

 Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com