Lolo kalaboso

SWAK sa kulungan ang 56-anyos lolo dahil sa reklamong paulit-ulit na panggagahasa sa isang tinderang menor de edad, sa Caloocan City kamakalawa ng hapon.

Kinilala ang suspek na si Francisco Capati, 56, ng Sabalo St., Brgy. 14, nahaharap sa kasong rape in relation to Republic Act 7610.

Sa ulat ng Women and Children Protection Desk (WCPD) naganap ang panggagahasa dakong 4:50 p.m. kamakalawa, sa loob ng bahay ng suspek  sa nasabing lugar.

Salaysay ng biktimang itinago sa pangalang Rachelle, 13-anyos, tindera ng samo’t saring kutkutin,  tinawag siya ng suspek para bumili ng mani kaya pinapasok siya sa loob ng bahay.

Pagpasok pa lamang ay bigla siyang hinatak ng suspek saka sapilitang hinubaran hanggang magtagumpay na mailugso ang puri ng biktima.

Ayon sa biktima, nagbanta ang suspek na may mangyayaring masama kapag hindi pumayag sa gusto niya kaya ilang ulit pa siyang pinagparausan ng matanda.

Nang makaraos ang matanda,  pinayagan na siyang makaalis saka inabutan ng P200 at pinagtabuyan kaya agad nagsumbong sa kanyang mga kaanak ang biktima at agad ipinaaresto ang suspek.  (rommel sales)