HATAW! D'yaryo ng Bayan hatawtabloid.com
LEGAZPI CITY – Patay ang barangay kapitan at ang kanyang ina habang dalawang iba pa ang sugatan makaraan pagbabarilin sa kanilang bahay kahapon ng madaling-araw sa syudad ng Masbate.
Kinilala ang mga namatay na si Barangay Kapitan Alan Marcos at ina niyang si Purita Marcos.
Ayon sa inisyal na ulat, nabulabog sa magkakasunod na putok ng baril ang mga residente dakong 2:30 a.m. sa Brgy. Igang, lungsod ng Masbate. Pagkaraan ay tumambad sa kanila ang duguang mga biktima.
Agad nalagutan ng hininga sa insidente ang barangay chairman na pinaniniwalaang siyang target ng mga suspek, kasunod ang kanyang ina.
Kabilang sa dalawang sugatan ang misis ni Marcos na si Analyn.
Bagama’t wala pang resulta ang imbestigasyon ng pulisya, ibinunyag ni Bgry. Kagawad Dominador Manlapas na may personal na kaalitan ang biktima. (BETH JULIAN)
