Ulo ng kelot durog sa dos por dos (Nakipag-agawan sa mic)

NADUROG ang ulo ng 26-anyos lalaki matapos pagtulungan hatawin ng dos por dos ng tatlong hindi nakilalang suspek makaraan makipag-agawan sa mikropono sa videoke bar kahapon ng madaling-araw sa Caloocan City.

Agad nalagutan ng hininga sa insidente ang biktimang si Bryan Timpug, ng Block 8A, Lot 16, Phase 2, Hito St., Brgy. Longos, Malabon City.

Batay sa ulat ni SPO1 Joselito Barredo, dakong 1:30 a.m. nang maganap ang insidente sa bahagi ng Tanigue St., Brgy. 14 ng nasabing lungsod.

Nauna rito, nakikipag-inoman ang biktima sa Grajo Resto Bar sa nasabing lugar hanggang marinig na nakikipagtalo siya sa isa sa mga suspek bunsod ng pag-aagawan sa mikropono.

Ang dalawa ay nagpapasikat sa pagkanta sa magandang waitress na kapwa nila pinopormahan. Ngunit agad din napayapa ang kaguluhan.

Pagkaraan ay lumabas ang biktima upang sunduin ang isa pa niyang kasama. Ngunit lingid sa kanyang kaalaman ay sinundan siya ng mga suspek at pinagtulungan siyang hatawin ng dos por dos na nagresulta sa kanyang kamatayan.

(ROMMEL SALES)