HATAW! D'yaryo ng Bayan hatawtabloid.com
PATAY ang isang taon gulang sanggol na babae at 19-anyos binatilyong kapitbahay makaraang pagbabarilin sa loob ng bahay ng pamilya ng paslit sa Rodriguez, Rizal kamakalwa ng gabi.
Kinilala ni Supt. Samuel Delorino, hepe ng Rodriguez Police, ang mga biktimang sina Angelica Amores, isang taon gulang, ng Blk. 16, Lot 2, Phase 1, Eastwood Greenview, Brgy. San Isidro, at Lorins Hamor, 19, nakatira rin sa nabanggit na lugar.
Target ng manhunt operation ng mga awtoridad ang tatlong suspek na tumakas lulan ng dalawang motorsiklo.
Sa imbestigasyon ni SPO1 Vladimir Dizon, dakong 8:10 p.m. nang mangyari ang insidente sa bahay ng pamilya Amores.
Nabatid na nagtungo sa bahay ng pamilya Amores si Hamor at nakipaglaro kay Angelica.
Ngunit biglang pumasok ang mga suspek at pinaputukan si Hamor. Agad namatay sa insidente si Hamor habang nahagip din ng bala ang sanggol.
Sa paunang imbestigasyon ng pulisya, nabatid na ang target ng mga suspek ay ang ama ni Angelica na si Athur Amores na sinasabing runner ng droga ngunit nagkamali ng puntirya ang mga salarin.
(ED MORENO)
