Tatapusin o hihirit pa?

ITOTODO na ng San Mig Coffee ang paghataw kontra Rain or Shine sa Game Six ng Finals ng  PLDT myDSL PBA  Philippine Cup mamayang 8 pm sa  Smart Araneta Coliseum sa Quezon Cty.

matapos na madiskaril sa layuning tapusin ang serye noong Linggo, ayaw na nina coach Tim Cone at mga bata niya na mabinbin muli ang kanilang selebrasyon.

Humirit ng 81-74 panalo ang Elasto Painters sa Game Five upang paliitin ang bentahe ng Mixers sa serye, 3-2. Hangad ng Elasto Painters na maitabla ang serye upang mapuwersa sa winner-take-all Game Seven ang Mixers sa Biyernes.

Pero ayaw ni Cone na mangyari ito dahil alam niya na mapupunta sa Rain Or Shine ang momentum.

“The hardest thing to do is to close out a series. Alam namin iyon. Pero pipilitin namin sa Game Six. Ayaw namin umabot sa Game Seven,” ani two-time Most Valuable Player James Yap na kagaya ni Marc Pingris ay gumawa ng 18 puntos sa Game Five.

Nag-ambag ng 11 si Alex Mallari at 10 si Mark Barroca sa Game Five.

Bumawi naman sa masamang performances sa game Three at Four si Jeff Chan na nagtala ng game-high 24 puntos sa Game Five. Sinuportahan  siya ni Beau Belga na gumawa ng 10 at Chris Tiu na nagtala ng 9.

Umaasa si Guiao na magkakatulungan nang husto sina Chan at Paul Lee.  “Ang problema kasi ay hindi nagkakasabay ang magandang laro nina Lee at Chan.”

Sa Game Five, si Lee ay nagtala lang ng walong puntos. Siya ay gumawa ng 23 sa Game Three at 28 sa Game Four kung saan natalo ang Elasto Painters.

Ang iba pang inaasahan ni Guiao ay sina Gabe Norwood, Ryan Arana, JR Quinahan at rookies Raymond Almazan, Alex Nuyles at Jeric Teng.

Ang ibang pambato ng San Mig Coffee ay sina  Joe DeVance, Rafi Reavis, Peter June Simon at Justin Melton.

(SABRINA PASCUA)