HATAW! D'yaryo ng Bayan hatawtabloid.com
BACOLOD CITY – Patay ang tatlong batang magkakapatid nang makulong sa nasusunog nilang bahay kahapon ng tanghali sa lungsod na ito.
Ang mga biktima ay kinilalang sina Rica Montero, 16, pipi; Rex, 4; at Kulot, 3-anyos.
Natutulog ang mga biktima nang mangyari ang sunog dakong 12 p.m. sa Purok Cauayanan, Brgy. Handumanan, Bacolod City.
Napag-alaman na wala sa bahay ang mga magulang ng mga bata na namili ng panindang gulay.
Kasama lamang ng mga bata ay ang kanilang lola ngunit sinasabi na ikinandado ang pinto upang hindi maglaro sa labas ang mga biktima.
Ayon sa ulat, nagsaing ang lola ngunit umuwi saglit sa sariling bahay na katabi ng bahay ng mga biktima.
Ngunit pagbalik ay malaki na ang apoy at hindi na nagawang mailigtas ang kanyang mga apo. Sugatan din sa insidente ang lola ng mga biktima.
Mabilis na kumalat ang apoy at nilamon ang lima pang kabahayan.
Inaalam pa ng mga bombero kung ano ang sanhi ng sunog dahil may nagsabi na posibleng sa charger na pumutok na ginamit ng piping biktima, nagsimula ang apoy.
