4-anyos nene walang galos sa ‘lumipad’ na Florida bus

ITINUTURING milagro ang pagkakaligtas sa 4-anyos batang babae, kasama sa mga nakaligtas sa nahulog na Florida Bus sa aksidenteng nangyari sa Mt. Province na ikinamatay ng 15 katao kabilang ang komedyanteng si Tado o Arvin Jimenez, at 32 iba pa nasugatan.

Sa ulat ng National Disaster Risk Reduction and Management Council (NDRRMC), kinilala ang survivor na si Amian Agustin, 4, walang galos sa katawan.

Hindi pa malaman ng mga awtoridad kung paano nakaligtas ang paslit sa malagim na trahedya.

Kung makikita ang bus na nahulog sa tinatayang may lalim na 150 metro bangin sa matarik na kabundukan sa Mt. Province, animo’y eroplanong bumagsak ang sasakyan na wala nang bubong at halos magkapira-piraso.

2 bangkay naiuwi na

LABI NI TADO 12 PA, NASA BONTOC PA

Dalawa sa 15 namatay sa nahulog na pampasaherong bus sa Bontoc, Mountain Province noong Biyernes, ang naiuwi na sa kanilang probinsya.

Nananatili sa Bontoc General Hospital ang labi ng iba pang namatay kasama ang komedyanteng si Arvin “Tado” Jimenez at dalawang dayuhan.

Pito ang nasa malalang kondisyon nasa Luis Hora Hospital sa Bauko, Mt. Province na sina, Sylvestre Dawey, Olivia Aglipay, Camille Osorio, Christian Cabarte, Agong Sikam, Abegail Sikam at Amian Sikam.

Inaasahang magpapadala ng chopper ang Northern Luzon Command (NOLCOM) Sabado ng umaga upang mailipat sa ospital sa Maynila ang ibang pasyente.

FLORIDA TRANS 30-ARAW SUSPENDIDO — LTFRB

Pinatawan ng Land Transportation Franchising and Regulatory Board (LTFRB) ng 30-araw na preventive suspension ang Florida Transport matapos maaksidente ang bus nito na ikinamatay ng 15 katao kasama ang komedyanteng si Arvin “Tado” Jimenez.

Naisilbi na ng LTFRB legal team kahapon ng umaga ang suspension order sa dalawang terminal ng Florida Transport.

Si Eugene Maribao, process server ng legal division ang nagsilbi ng kautusan sa pamunuan ng Florida Transport sa Earnshaw terminal sa Sampaloc, na tinanggap ng sekretaryang si Flora Caldito.

Naihain na rin sa Cubao terminal ng bus company ang kautusan dakong 10:30 ng umaga.

DUMAYB NA BUS ‘DI NAKAPANGALAN  SA FLORIDA BUS

Ilegal na nabili ng G.V. Florida Transport Inc., ang naaksidenteng bus sa Mountain Province nitong Biyernes na nagresulta sa pagkamatay ng 15 katao.

Ayon sa Land Transportation Franchising and Regulatory Board (LTFRB), nakapangalan ang bus sa isang “Mr. Que.”

Napag-alaman din nabili ng Florida Transport ang maliit na kompanya ni “Mr. Que” kasama ang bus na nahulog sa bangin pero, taliwas sa panuntunan ng LTFRB, hindi naiulat sa kanila ang transaksyon sa pagitan ng dalawang panig.

Ang plakang nakakabit sa naaksidenteng bus ay hindi ang orihinal na plaka nito.

Nasa 300 bus unit ang pag-aari ng Florida Trasport kabilang na ang mga subsidiary nito at mga division kasama ang pag-aari rin nilang Dagupan Bus Line, Ballesteros Bus at Dagupan Bus.

ni BETH JULIAN