Erpat tigbak sa tarak ng adik na anak

“PAPA  mahal mo ba ako?”

Mga katagang sinambit ng 30-anyos anak sa kanyang sariling ama, bago pagsasaksakin hanggang mapatay sa harap ng kanyang ina kamakalawa ng hapon, sa Pasay City.

Inakalang walang pagmamahal sa kanya kaya’t nagawang saksakin ng ilang ulit ni Alfredo Villavert, Jr., ang sariling amang si Alfredo Villavert, Sr., 64, ng 551 E. Rodriguez Ext., ng lungsod.

Nang makitang duguang tumimbuwang ang ama, tumakas ang suspek dala ang patalim na ginamit sa pagpaslang sa ama.

Naisugod pa sa Pasay City General Hospital ang matandang Villavert, Sr., pero binawian din ng buhay sanhi ng mga tama ng saksak sa iba’t ibang parte ng katawan.

Makalipas ang tatlong oras, isinuko ng kanyang mga kapatid ang suspek na umano’y drug addict at miyembro ng Sigue-Sigue Sputnik Gang.

Sa imbestigasyon ni SPO1 Ricardo Mallong, Jr., nakaupo sa sopa at nagpapahinga ang mag-asawang Alfredo at Marietta Villavert, dakong 12:30 ng hapon, nang lapitan ng suspek at kinompronta ang ama kaugnay sa umano’y hindi parehas na pagmamahal sa kanyang mga anak.

Tinanong ng suspek ang ama kung mahal siya na tinugon ng biktima na mahal niya ang anak pero hindi pinaniwalaan ng suspek .

“Hindi ako naniniwala, hindi ko maramdaman, Papa, ibigay mo naman sa akin! Iparamdam mo naman sa akin ‘yon pagmamahal mo. Nahihirapan na ako, ‘yon lang naman ang hinihingi ko, kahit hindi masarap ang pagkain basta magkakasundo tayo,” sabi ng suspek.

Sinabi pa ng suspek na imbes mamatay siya, ang ama na lang ang papatayin niya.

(JAJA GARCIA)