HATAW! D'yaryo ng Bayan hatawtabloid.com
LIMANG pulis ng Southern Police District Office (SPDO) ang sinibak sa pwesto kahapon, kabilang ang dalawang opisyal, na nagproseso sa pagpapa-blotter ng grupo ni Cedric Lee at Deniece Cornejo laban sa actor/TV host Vhong Navarro, nitong Enero 22, sa Taguig City.
Ayon kay SPDO Director, Chief Supt. Jose Erwin Villacorte, pansamantala nilang inalis sa pwesto ang hepe ng District Investigation and Detective Management (DIDM), si Supt. Nelson Bautista; si PO3 Dalmacio Lumiwan, ang nagsulat sa blotter; inalis din ang noo’y officer of the day at naka-duty sa presinto na sina Sr. Insp. Eduardo Alcantara; police officers (POs) 3 Rolly Laureto at Eugene Pugal.
Inilipat ang limang pulis sa District Personnel Holding Unit ng SPDO habang isinasagawa ng District Internal Affairs Service (DIAS) ang imbestigasyon.
Posibleng maharap ang lima sa administrative lapses case sa hindi nila pagpapa-medical exam kay Navarro, kahit nakita nilang maga ang mukha ng actor/TV host dahil sa pagkabugbog.
Nilinaw ng SPD Director Chief Supt. Villacorte, kung mapatunayan nagkulang ang mga pulis, maparurusahan sila, pero kapag napatunayang ginawa nila ang lahat at walang naging pagkukulang ay ibabalik din sila sa kanilang pwesto.
(JAJA GARCIA)
