Malolos Mayor, 1 pa grabeng napinsala (Driver bodyguard patay sa banggaan)

NAKARATAY sa pagamutan ang alkalde ng Malolos City at ang kanyang close-in security habang agad binawian ng buhay ang kanyang driver-bodyguard matapos salpukin ng Isuzu Tractor Head ang sinasakyan nilang Mitsubishi Montero sa intersection ng Pulilan – Plaridel Bypass Road sa bahagi ng Brgy. Sto. Cristo, Pulilan, Bulacan, kamakalawa ng gabi.

Ayon sa inisyal na imbestigasyon ng pulisya, lulan ng Montero si Mayor Christian Natividad at nakaupo sa likurang bahagi kasama ang kanyang mga bodyguard, nang bigla na lamang bumulaga sa kanilang harapan ang truck mula sa kaliwang bahagi ng intersection na humantong sa banggaan.

Agad binawian ng buhay ang driver-bodyguard na si Roderick Santiago, naipit sa driver seat ng sasakyan na nayupi ang kaliwang bahagi ng harapan.

Grabe naman ang naging pinsala ng alkalde at ng kanyang isa pang bodyguard na kasama sa sasakyan.

Nasa kustodiya na ng pulisya ang driver ng truck na hindi agad nakuha ang pangalan, sinampahan ng kasong reckless imprudence resulting in homicide, serious physical injuries and damage to property.

ni DAISY MEDINA