28,000 sako ng fertilizer nilamon ng dagat (Cargo vessel lumubog)

BUNSOD ng malalakas na alon na dulot ng Bagyong Agaton, bumangga ang isang cargo vessel sa isa pang barko na naging sanhi sa paglubog kahapon ng madaling sa pagitan ng karagatan ng Iloilo at Guimaras.

Ayon sa report, ligtas na na-rescue ang nasa 29 crew ng nasabing cargo vessel, ang MV Sportivo.

Nabatid na nakatakda sanang umalis dakong umaga ang nasabing cargo vessel patungong Palawan para i-deliver ang karga nitong 28,000 sako ng fertilizer.

Agad kumilos ang mga awtoridad para maiwasan ang pagtagas ng langis mula sa lumubog na barko.

Samantala, sinabi ng kapitan ng barko na si Nemesio Igona ng Cebu City, natanggal ang kanilang angkla kaya’t natangay nang malakas na hangin at alon ang kanilang barko at bumangga sa isa pang barko.

Nabutas aniya ang harapang bahagi ng barko at mabilis na pumasok ang tubig at lumubog agad ito makalipas ang 20 minuto. (HNT)